Obradoiro Dixital Galego

Que facemos?

A Asociación Cultural Obradoiro Dixital Galego ten como obxectivo principal ser impulsora, divulgadora e defender os intereses da comunidade creadora de contido en liña en galego, en calquera das súas normas ortográficas, en Twitch, Youtube, Instagram, TikTok e plataformas similares, así como en formato podcast e blogues. As nosas arelas son:

• Constituírmonos en comunidade e punto de encontro das persoas creadoras de contido en galego e fomentar a colaboración entre elas.
• Promover e defender a lingua galega e o seu uso en todos os ámbitos, asumindo un papel activo na normalización do idioma.
• Traballar por, e promover, a non discriminación por causa de xénero, raza, cultura ou orientación sexual, así como valores relacionados.
• E traballar pola creación dunha etiqueta ou denominador que sirva para distinguir o contido en lingua galega en Twitch e plataformas similares nas que non exista.

Para iso, a Asociación leva a cabo diversas actividades e proxectos, entre os cales se atopan:

• Difundir contido en liña en galego nas canles propias da asociación.
• Manter rexistros actualizados de canles e persoas creadoras na nosa web.
• Asesorar e prestar asistencia a persoas creadoras de contido ou con intención de crear contido en galego.
• Promover o traballo e obxectivos da asociación entre o público en xeral.
• Realizar calquera tipo de campañas ou eventos públicos ou culturais, de maneira presencial ou telemática.
• Establecer redes de cooperación con centros educativos e outras entidades.

Queres máis? Asóciate!

Como socia do Obradoiro Dixital Galego, poderás participar de todas as nosas actividades e funcionamento interno. Só tes que descargar e cubrir a ficha que atoparás premendo nesta ligazón, asinala e devolvérnola ás direcións indicadas. Entre outras vantaxes, como asociada poderás:

• Contratar dominios .gal a un precio non superior a 13€+IVE, grazas ao convenio que Obradoiro Dixital Galego ten con PuntoGal.
• As túas canles serán difundidas de maneira prioritaria a través dos nosos medios.
• Difundir de maneira presencial a túa canle nas feiras e eventos aos que asistimos.
• Acceder ás canles de Telegram da asociación.
• Utilizar as canles da asociación (directo, vídeo, redes sociais e plataformas) para proxectos persoais e colaborativos, pedíndoas a través dun formulario de solicitude.
• Acceder de maneira prioritaria ás formacións organizadas e promovidas polo Obradoiro Dixital Galego.
• Asistir e participar plenamente nas xuntanzas organizadas e promovidas pola asociación para desvirtualizar, coñecer e colaborar con outras creadoras de contido coma ti.

Xuntas somos rede! Xuntas somos Obradoiro Dixital Galego!

Cota de socio

Ser socio require dunha pequena aportación económica. Tes varias opcións:

• 12€/ano como cota reducida para estudantes e persoas desempregadas
• 24€/ano como cota xeral para o resto de persoas
• Podes personalizar a cota se queres aportar máis de 24€/ano

Esta aportación é unha grande axuda e que nos permite pagar cousas como:

• Material e aluguer de postos.
• Os servidores que aloxan a web e aplicativos que difunden o contido.
• E en definitiva é un apoio directo á normalización da nosa lingua nos novos medios.

Estatutos

Podes consultar os estatutos da asociación premendo nesta ligazón.